കുടിയേറ്റ സമൂഹം പടുത്തുയർത്തിയ ന്യൂയോർക്കിന് കുടിയേറ്റക്കാരൻ മേയർ ഉണ്ടാവുകയെന്നത് സ്വാഭാവിക പ്രതിഭാസമാണ്. കൊളോണിയൽ വർണ്ണ മേൽക്കോയ്മയോട് കാലം മറുവാക്ക് പറയുകയാണെന്ന് വിലയിരുത്താം. കാനാനിൽ നിന്ന് നിർബന്ധിത അടിമത്വത്തിന് വിധേയമായി കുടിയേറിയ ഇസ്രായേൽ പ്രവാചകന്റെ പുത്രൻ ജോസഫ്(യൂസുഫ് പ്രവാചകൻ) പിൽകാലത്ത് മിസ്രായിം(ഈജിപ്ത്) ദേശത്തെ ഭക്ഷ്യവിതരണ വകുപ്പ് മന്ത്രിയായ ചരിത്രം ഹീബ്രു ബൈബിളിലും ഖുർആനിലും കാണാം. ഉഗാണ്ടയിൽ നിന്ന് കുടിയേറിയ ഇന്ത്യൻ വംശജരുടെ പുത്രൻ ന്യൂയോർക്ക് മേയർ ആകുന്ന വാർത്ത കേൾക്കുമ്പോൾ അത്തരം ചരിത്രങ്ങളിലെ സമാനതകൾ പലതുമാണ് ഓർമ് വരുക. സൊഹ്റാൻ മംദാനിയെ പോലുള്ള ഡെമോക്രാറ്റിക് സോഷ്യലിസ്റ്റുകൾക്ക് മുതലാളിത്ത സാമ്പത്തിക ക്രമത്തിന്റെ ഭാഗമായി നിന്നുകൊണ്ടുത്തനെ അടിസ്ഥാന ജനവിഭാഗത്തിന്റെ പ്രശ്നങ്ങളെ അഡ്രസ് ചെയ്യാനാവുന്നു എന്നതാണ് അമേരിക്കൻ ഐക്യനാട് നൽകുന്ന നല്ല സൂചന. ഇസ്ലാമോഫോബിക് ആയ ഭരണകൂട-മാധ്യമ നരേഷനുകളെ വകഞ്ഞിട്ടാണ് മുസ്ലിം സ്വത്വം മാസ്ക് ചെയ്യാതെ സൊഹ്റാൻ മംദാനി ഇലക്ഷൻ കാംപയിൻ മുന്നോട്ടു കൊണ്ടു പോയത്. അതും ഫലസ്തീൻ കോസിന് അനുകൂല പരാമർശങ്ങൾ നടത്തിക്കൊണ്ട്.
താനൊരു മുസ്ലിമാണ്, ഡെമോക്രാറ്റിക് സോഷ്യലിസ്റ്റാണ്, എന്ന് പറയുന്നതിൽ അദ്ദേഹം അഭിമാനിക്കുന്നതായി കാണാം. മംദാനി കമ്യൂണിസ്റ്റ് ആണ് എന്ന പ്രസിഡന്റ് ട്രംപിന്റെ ആക്ഷേപത്തിന് മറുപടിയായി ഐഡന്റിറ്റി വെളിപ്പെടുത്തുകയായിരുന്നു മംദാനി. മുസ്ലിമാവുക എന്നത് പാശ്ചാത്യ, അമേരിക്കൻ കോണ്ടസ്റ്റിൽ റവല്യൂഷനറിയാവുക എന്നായി തീർന്നിരിക്കുന്നു. അതോടൊപ്പം വർക്കിങ്,ലേബർ ക്ലാസുകൾക്കു വേണ്ടി ശബാദിക്കാൻ കമ്യൂണിസ്റ്റ് ആകണമെന്ന വാർപ്പുധാരണയും താൻ ഡെമോക്രാറ്റിക് സോഷ്യലിസ്റ്റാണ് എന്ന മറുപടി കൊടുത്തുകൊണ്ട് മംദാനി നീക്കം ചെയ്യുകയാണ്. കമ്യൂണിസ്റ്റ് ആവുകയെന്നത് അത്ര അഭിമാനിക്കാവുന്ന ഒന്നല്ല എന്ന സൂചനയും മറുപടിയിൽ നിഴലിക്കുന്നുണ്ട്. സത്യാനന്തര ലോകക്രമത്തിൽ മാർക്സിയൻ വർഗ്ഗസമര കമ്യൂണിസ്റ്റ് വാദങ്ങൾക്ക് പ്രസക്തിയില്ല എന്നതും അത്തരം വാദങ്ങൾ അപഹാസ്യമാണെന്നും കൂടി മംദാനിയുടെ സ്വത്വപ്രകാശനത്തിലൂടെ സൂചിതമാകുന്നു.
സാധാരണയിൽ മുല്ലമാർ പ്രമോട്ട് ചെയ്യുന്ന റിച്ച്വൽ പ്രാക്ടീസിങ് മുസ്ലിം എന്നതിനപ്പുറം സോഷ്യോ എകണോമിക് തലത്തിൽ ഇസ്ലാമിക ദർശന കാഴ്ച പാടുകളെ മംദാനി പ്രതിനിധാനം ചെയ്യുമെന്ന് ഉറപ്പാണ്. മുത്തശ്ശി സുൽഫത്ത് തന്നെ പ്രവാചക സുന്നത്ത് അനുസരിച്ച് ജീവിക്കാൻ പഠിപ്പിച്ചിട്ടുണ്ട് എന്ന മംദാനിയുടെ സംസാരം തക്ബീർ എന്നു പറഞ്ഞുകൊണ്ടാണ് ആഫ്രിക്കൻ-അമേരിക്കൻ കുടുംബിനികൾ പോലും വരവേറ്റത്. ന്യൂയോർക്കിലെ ജൂതസമൂഹത്തോട് അടുപ്പം സൂക്ഷിക്കന്നതോടൊപ്പം സിയോണിസ്റ്റ് ഇസ്രായേൽ അജണ്ടകളെ തുറന്നെതിർക്കുക കൂടി ചെയ്യുന്നുണ്ട് ഈ 34കാരൻ.
ന്യൂയോർക്ക് മേയർ സ്ഥാനത്തേക്കുള്ള വിധിയെഴുത്തിൽ ഡെമോക്രാറ്റിക് സ്ഥാനാർഥിയും ഇന്ത്യൻ വംശജനുമായ സൊഹ്റാൻ മംദാനി വിജയം ഉറപ്പിച്ചത് ഇങ്ങനെയൊക്കെ സത്യസന്ധത കാണിച്ചതുകൊണ്ടു കൂടിയാണ്.
ഗവർണർ ആൻഡ്രൂ കുമോ, റിപ്പബ്ലിക്കൻ പാർട്ടിയിലെ കർട്ടിസ് സ്ലിവ എന്നിവരാണ് മത്സര രംഗത്തുണ്ടായിരുന്നത്. ഡെമോക്രാറ്റിക് പ്രൈമറിയിൽ മുൻ ഗവർണർ ആൻഡ്രൂ കോമോയെ അട്ടിമറിച്ചാണ് നേരത്തെ സൊഹ്റാൻ മംദാനി തെരഞ്ഞെടുപ്പ് കാംപയിൻ തനിക്ക് അനുകൂലമാക്കിയത്.
ഇന്ത്യൻ വംശജരായ രക്ഷിതാക്കളിൽ ഉഗാണ്ടൻ തലസ്ഥാനമായ കംപാലയിലാണ് മംദാനി ജനിച്ചത്. 2018ലാണ് യുഎസ് പൗരത്വം സ്വീകരിക്കുന്നത്. ചലച്ചിത്ര നിർമ്മാതാവ് മീരാ നായരുടെയും ഉഗാണ്ടൻ അക്കാദമീഷ്യനായ മഹമൂദ് മംദാനിയുടെയും മകനാണ്.
ഫലസ്തീൻ അനുകൂല നിലപാട് സ്വീകരിച്ചതും ഇസ്രായേലിൻ്റെ ഗസയുദ്ധം വംശഹത്യയാണെന്ന് തുറന്നു പറഞ്ഞതും ഉൾപ്പെടെയുള്ള നിലപടുകൾ യു.എസ് പ്രസിഡൻ്റ് ട്രംപിനെ പ്രകോപിപ്പിച്ചിരുന്നു. ന്യൂയോർക്കിൽ എത്തിയാൽ യുദ്ധക്കുറ്റവാളിയായ ഇസ്രായേല്‍ പ്രധാനമന്ത്രി ബിന്യമിൻ നെതന്യാഹുവിനെ അറസ്റ്റ് ചെയ്യുമെന്നും മംദാനി ക്യാംപയിനിനിടെ പ്രഖ്യാപനം നടത്തി.
ട്രൂത്ത് സോഷ്യലിൽ പങ്കുവെച്ച പോസ്റ്റിൽ, ന്യൂയോർക്ക് ഭരിക്കുന്നത് ഒരു കമ്മ്യൂണിസ്റ്റാണെങ്കിൽ, അവിടേക്ക് അയക്കുന്ന പണം വെറും പാഴ് ചെലവാണെന്ന് ട്രംപ് പറഞ്ഞിരുന്നു.
മംദാനിയാണ് മേയറെങ്കിൽ ന്യൂയോർക്കിന് പണം നൽകുന്നത് തനിക്ക് ബുദ്ധിമുട്ടായിരിക്കും എന്നും ട്രംപ് തുറന്നടിച്ചിരുന്നു.എന്നിട്ടും ന്യൂയോർക്കിലെ ജനങ്ങൾ മംദാനിയെ തെരഞ്ഞെടുത്തു. നിലവിൽ സ്റ്റേറ്റ് അംസബ്ലി അംഗമായ സൊഹ്റാൻ മംദാനി ന്യൂയോർക്കിലെ സാധാരണക്കാരായ കുടിയേറ്റ ജനതയുടെ പ്രതിനിധിയായാണ് യുഎസ് രാഷ്ട്രീയത്തിൽ സജീവമായത്. ആരോഗ്യ മേഖലയിലെയും നികുതിയിനത്തിലെയും അമിതഭാരം ലഘൂകരിക്കുമെന്നതായിരുന്നു മംദാനിയുടെ തെരഞ്ഞെടുപ്പ് വാഗ്ദാനങ്ങൾ.സാധാരണക്കാർ പ്രതീക്ഷ വച്ചത് ഈ വാഗ്ദാനങ്ങളിലാണ്.
Comments
Post a Comment