ഡൽഹിയിൽ ചെങ്കോട്ടക്ക് സമീപമുണ്ടായ സ്ഫോടനം രാജ്യത്തെ നടുക്കി: നിർണായക വിവരങ്ങൾ ലഭിച്ചു

കേരളം, മുംബൈ, കൊൽക്കത്ത എന്നിവിടങ്ങളിൽ ജാഗ്രതാ നിർദേശം 

ന്യൂഡൽഹി: ഡൽഹിയിൽ ചെങ്കോട്ടക്ക് സമീപമുണ്ടായ സ്ഫോടനം രാജ്യത്തെ നടുക്കിയിരിക്കുകയാണ്. സംഭവത്തെ സംബന്ധിച്ച നിർണായക വിവരം പോലീസിന് ലഭിച്ചു. പുൽവാമ സ്വദേശിയുടെ ഉടമസ്ഥതയിലുള്ള കാറാണ് പൊട്ടിത്തെറിച്ചത് എന്നാണ് ലഭിച്ചിരിക്കുന്ന സൂചന. 

സ്ഫോടനത്തിൽ മരിച്ചവരുടെ എണ്ണം പത്തായി.സംഭവത്തെ തുടർന്ന് കേരളത്തിലും മുംബൈയിലും കൊൽക്കത്തയിലും രഹസ്യാന്വേഷണ ഏജൻസികൾ ജാഗ്രതാ നിർദേശം നൽകിയിരിക്കുകയാണ്. കേരളത്തിലടക്കം ജാഗ്രതാ നിർദേശമുണ്ടെന്ന് സംസ്ഥാന ഡിജിപി റവാഡ ചന്ദ്രശേഖർ മാധ്യമങ്ങളോട് പ്രതികരിച്ചു.  24 പർക്ക് പരിക്കേറ്റിട്ടുണ്ട്. പലരുടെയും നില ​ഗുരുതരമാണ്. സ്ഫോടനമുണ്ടായത് ഹ്യുണ്ടായി ഐ ട്വന്റി കാറിലാണെന്ന് കേന്ദ്ര ആഭ്യന്തര മന്ത്രി അമിത് ഷാ പറഞ്ഞു.

തിങ്കളാഴ്ച വൈകുന്നേരം 6.52 ന് ചെങ്കോട്ട യ്ക്കും സമീപത്തേക്ക് പതിയെ വന്ന കാർ സിഗ്നലിൽ വെച്ച് പൊട്ടിത്തെറിക്കുകയായിരുന്നു.  

 സ്ഫോടനത്തിൽ സമീപത്തുള്ള വാഹനങ്ങൾക്കും കേടുപാടുകൾ സംഭവിച്ചു. എഫ്എസ്എൽ, എൻഐഎ ഉൾപ്പെടെയുള്ള  കേന്ദ്ര ഏജൻസികൾ  സ്ഥിതിഗതികൾ നിരീക്ഷിച്ചുകൊണ്ടിരിക്കുകയാണ്. 

സ്ഫോടനത്തെ തുടർന്ന് കേന്ദ്ര ആഭ്യന്തര മന്ത്രി അമിത് ഷാ പ്രധാനമന്ത്രി നരേന്ദ്ര മോദിയുമായി സംസാരിച്ചു. ഡൽഹി പൊലീസ് കമ്മീഷണറും എൻഐഎ, ഇന്റലിജൻസ് ബ്യൂറോ മേധാവികളും സ്ഥിതിഗതികൾ നിരീക്ഷിച്ച് ആഭ്യന്തര മന്ത്രിയെ അറിയിക്കുന്നുണ്ട്. ഡൽഹിയിൽ ഉടനീളം പൊലീസ് പട്രോളിംഗ് സജീവമാക്കി. ബാരിക്കേഡുകൾ സ്ഥാപിക്കാനും സംശയാസ്പദമായി കാണപ്പെടുന്ന വാഹനങ്ങൾ തടഞ്ഞു പരിശോധിക്കാനും നിർദേശിച്ചിട്ടുണ്ട്.

ഡൽഹിയിലെ പ്രധാന വ്യാപാര കേന്ദ്രമായ ചാന്ദ്‌നി ചൗക്കിന്  എതിർവശത്ത് സ്ഥിതി ചെയ്യുന്ന ചെങ്കോട്ടയുടെ ഒന്നാം നമ്പർ ഗേറ്റിന് സമീപമാണ് സ്ഫോടനം നടന്നത്. സ്ഫോടനത്തിൽ കെട്ടിടം കുലുങ്ങിയാതായും കുറച്ച് നേരത്തേക്ക് എന്താണ് നടക്കുന്നതെന്ന് മനസിലായില്ലെന്നും  ചാന്ദ്‌നി ചൗക്ക് ട്രേഡേഴ്‌സ് അസോസിയേഷന്റെ പ്രസിഡന്റ് സഞ്ജയ് ഭാർഗവ് പറഞ്ഞതായി വാർത്താ ഏജൻസകൾ റിപ്പോർട്ട് ചെയ്യുന്നു. ശരീരഭാഗങ്ങൾ ചിതറി റോഡിൽ വീഴുന്നത് തന്റെ കണ്മുന്നിൽ കണ്ടതായും ഉഗ്ര സ്ഫോടനമായിരുന്നുവെന്നും  ഒരു ദൃക്‌സാക്ഷി പറഞ്ഞതായി എൻഡിടിവി റിപ്പോർട്ട് ചെയ്യുന്നു. ചെങ്കോട്ടയ്ക്ക് സമീപത്ത് നിന്ന് വെടിയുണ്ടകൾ കണ്ടെടുത്തതായും  റിപ്പോർട്ടുണ്ട്.

ഡൽഹി സ്‌ഫോടനത്തിൽ രാഹുൽ ഗാന്ധിയും പ്രിയങ്ക ഗാന്ധിയും ആശങ്ക രേഖപ്പെടുത്തി. 'അങ്ങേയറ്റം ഹൃദയഭേദകവും ആശങ്കാജനകവും'. രാഹുൽ ഗാന്ധി എക്‌സിൽ പങ്കുവെച്ചു. പരിക്കേറ്റവരുടെ കുടുംബങ്ങൾക്ക് അനുശോചനം രേഖപ്പെടുത്തുന്നതായും പരിക്കേറ്റവർ വേഗത്തിൽ സുഖം പ്രാപിക്കട്ടെ എന്നും പ്രിയങ്ക ഗാന്ധി പറഞ്ഞു. സ്ഫോടനത്തിനു പിന്നിൽ എന്താണ് എന്നകാര്യം ദുരൂഹമായി തുടരുകയാണ്.