മൂന്നാർ എന്ന പേര് കിട്ടിയത് എങ്ങനെ? നീലകുറിഞ്ഞി പൂക്കുന്ന മേടുകളും, പുഴകളുടെ സംഗമവും: ഗ്യാപ്പ് റോഡിൽ വിസ്മയക്കാഴ്ചയൊരുക്കി മൂന്നാർ

പുഴകളുടെ സംഗമവും വരയാടുകൾ മേയുന്ന കുന്നുകളും, നീലകുറിഞ്ഞി പൂക്കുന്ന മേടുകളും,മേഘം തലോടുന്ന ആനമുടിയും .വിസ്മയക്കാഴ്ചയൊരുക്കി മൂന്നാർ  സഞ്ചാരികളെ തന്നിലേക്ക് അടുപ്പിക്കുകയാണ്

ദക്ഷിണേന്ത്യയിലെ മനോഹരമായ ഈ  ഹിൽസ്റ്റേഷന് ഒത്തിരി പ്രത്യേകതകളുണ്ട്. മുതിരപ്പുഴ, നല്ലതണ്ണി, കുണ്ടള എന്നീ മൂന്ന് അരുവികൾ സംയോജിക്കുന്നിടത്ത് രൂപംകൊണ്ട ജനവാസകേന്ദ്രമാണ് മൂന്നാർ. കേരളത്തിലെ ഇടുക്കി ജില്ലയിൽ സമുദ്രനിരപ്പിൽ നിന്നും 1,600 മീറ്റർ ഉയരത്തിൽ സ്ഥിതി ചെയ്യുന്ന മൂന്നാർ ബ്രിട്ടീഷ് ഗവൺമെന്റിന്റെ ദക്ഷിണേന്ത്യയിലെ വേനൽക്കാല ആസ്ഥാനമായിരുന്നു. യൂറോപ്പിനെ വെല്ലുന്ന തണുത്ത കാലാവസ്ഥയും പ്രകൃതി സൗന്ദര്യവും ഫലഭൂയിഷ്ഠതയുമാണ് മൂന്നാർ ആസ്ഥാനമാക്കാൻ വെള്ളക്കാരെ പ്രേരിപ്പിച്ചത്.  മനോഹരമായ തേയിലത്തോട്ടങ്ങളും കാനനപാതകളും ജലാശയങ്ങളും വന്യജീവി ആവാസവ്യവസ്ഥയും റിസോർട്ടുകളു മെല്ലാം ഉള്ള മൂന്നാർ ഇന്ന് വിനോദ സഞ്ചാരികളുടെ പറുദീസയാണ്. 12 വർഷത്തിലൊരിക്കൽ പൂക്കുന്ന നീലക്കുറിഞ്ഞി മൂന്നാറിലെ വിവിധ കുന്നുകളിലായി വർഷാവർഷം പൂക്കാറുണ്ട്. ദക്ഷിണേന്ത്യയിലെ ഏറ്റവും ഉയരംകൂടിയ കൊടുമുടിയായ ആനമുടി ഇവിടയാണ്. 2,695 മീറ്ററിലധികം ഉയരമുള്ള ആനമുടി മൂന്നാറിലെ ഇരവിക്കുളം നാഷനൽ പാർക്കിലാണ് സ്ഥിതിചെയ്യുന്നത്. നല്ലൊരു ട്രക്കിംഗ് സ്പോട്ട് കൂടിയാണിത്. മൂന്നാർ നഗരമധ്യത്തിൽ നിന്ന് അൽപം അകലയായി വ്യത്യസ്ത ദിശകളിലായാണ് പ്രധാന ടൂറിസ്റ്റ് ഡസ്റ്റിനേഷനുകളെല്ലാം ഉള്ളത്. അതുകൊണ്ടുതന്നെ എല്ലാം കണ്ടുതീർക്കാൻ ചുരുങ്ങിയത് മൂന്നു ദിവസമെങ്കിലും വേണ്ടി വരും. അവ ഏതൊക്കെയാണെന്ന് പരിശോധിക്കാം.

ആ യാത്രയിൽ കണ്ടത് 

 

സ്കൂൾ പഠനകാലം തൊട്ടുള്ള രണ്ടു കൂട്ടുകാരടോപ്പമാണ് ഇത്തവണ മൂന്നാർ യാത്ര നടത്തിയത്. ഹിൽസ്റ്റേഷനുകളിലെ ഓരോ സന്ദർശനവും പുതിയ അനുഭവങ്ങളാകുന്നത് എന്തുകൊണ്ടാകും! പ്രകൃതി പൂത്തും തളിർത്തും ഇലപൊഴിച്ചും ഋതുക്കൾ തുന്നുമ്പോൾ കാഴ്ചകളുടെ പനോരമ മാറിമറിയുകയാണ്. നാട്ടിൽ നിന്ന് ഉച്ചയോടെ പുറപ്പെട്ട ഞങ്ങൾ വൈകിട്ടാണ്  കാലടിയിലെത്തിയത്. ചായകുടിച്ച് വേഗത്തിൽ പുറപ്പെട്ടു. പെരുമ്പാവൂരിൽ നിന്ന് മൂന്നാർ റോഡിലേക്ക്.  എട്ടുമണിയോട് കൂടി മലമ്പാതയിൽ പ്രവേശിച്ചു. പൗർണമി നിലാവുള്ള രാത്രി. അടിമാലി എത്തുന്നതിന് മുമ്പ് ചീയപ്പാറ വെള്ളച്ചാട്ടത്തിന് സമീത്തെ റിസോർട്ടിലാണ് തങ്ങിയത്. ചെങ്കുത്തായ പാറക്കെട്ടിലൂടെ വെള്ളം പതഞ്ഞുപതിയ്ക്കുന്ന ശബ്ദം റൂമിലിരുന്നാൽ കേൾക്കാം.കാറ്റിനോട് കിന്നാരംപറഞ്ഞ് രാപാടികൾ പാടുന്നു. ഇടതടവില്ലാതെ ചിലച്ച് ചീവിടുകളും. അത്യാവശ്യത്തിനു തണുപ്പുണ്ട്. ഭക്ഷണം റൂമിലേക്ക് എത്തിച്ചു. പുലർച്ച നേരത്തെ പുണർന്നു. മഞ്ഞുകണങ്ങളെ കീറി വെട്ടം വീണുതുടങ്ങിയപ്പോൾ  അടിമാലിയിലെത്തി പ്രാതൽ കഴിച്ചു. വെള്ളത്തൂവൽ ,ചെങ്കുളം ഡാം വഴി മൂന്നാറിലേക്ക. ഗ്യാപ്പ് റോഡ്, പെരിയ കനാൽ വെള്ളച്ചാട്ടം, മാട്ടുപ്പെട്ടി, കുണ്ടല ഡാം, എക്കോ പോയിന്റ്, ടോപ്പ് സ്റ്റേഷൻ എന്നിവ സന്ദർശിച്ച ശേഷം കാഴ്ചയുടെ വിസ്മയങ്ങൾ നുകർന്ന് മൂന്നാർ ടൗണിലേക്ക് മടങ്ങി. ഉച്ചഭക്ഷണം  ടൗണിൽ നിന്ന്. രാവിലെ ഗ്യാപ്പ് റോഡിലൂടെ നടത്തിയ യാത്ര വിവരിക്കാനാവാത്ത അനുഭൂതിയാണ് സമ്മാനിച്ചത്. പ്രകൃതിയുടെ വശ്യത മുഴുവൻ സന്നിവേശിപ്പിച്ച ഇടം. പെരിയകനാൽ വെള്ളച്ചാട്ടവും ആനയിറങ്കൽ ജലാശയവുമെല്ലാം കണ്ടു. മൂന്നാർ ടൗൺ ജുമാമസ്ജിദിൽ വച്ച്  മധ്യാഹ്ന,അപരാഹ്ന നമസ്കാരങ്ങൾ സമന്വയിപ്പിച്ച്ചുരുക്കി നിർവഹിച്ചു. യാത്രയിൽ അതൊരു സൗകര്യമാണ്. സൗകര്യമില്ലാത്തപ്പോൾ വാഹനത്തിൽ വച്ച് തന്നെ നിർവഹിക്കാറാണ്. ഓരോ ഇടത്തെയും കാഴ്ചകളും പ്രകൃതിയും കണ്ണിലുടക്കൊമ്പോൾ ദൈവീക സൃഷ്ടി വൈഭവത്തെ അറിയാതെ പ്രകീർത്തിച്ചു പോകും. 'ദൈവമേ ഇതൊന്നും വെറുതെ സൃഷ്ടിച്ചതല്ലല്ലോ'. താഴ് വാരങ്ങളിലൂടെ അരുവികളൊഴുകുന്ന സ്വർഗീയ കാഴ്ചകളുടെ മാതൃകകൾ പോലെ. മൂന്നാർ വിസ്മയിപ്പിക്കുന്നു. വിവിധ ദേശക്കാരിയ സഞ്ചാരികൾ സംസ്കാരങ്ങളുടെ നിറക്കൂട്ട് തീർക്കുന്ന മൂന്നാറിന്റെ സ്ത്രൈണതയ്ക്ക് വശ്യതയുണ്ട്. ഉള്ളിൽ കുറിഞ്ഞി പൂത്തപോലെ നീലനിറമുള്ള കാറ്റ്.

 ഭക്ഷണശേഷം ഇരവികുളം നാഷണൽ പാർക്ക് കാണാൻ രാജമലയിലെത്തി. അപ്പോഴേക്ക് ടിക്കറ്റ് കൗണ്ടർ ക്ലോസ് ചെയ്തിരുന്നു. വരയാടുകളെ കാണാനാവാതെ നിരശയോട മറയൂരിലേക്ക് കുന്നിറങ്ങി. മൂടൽമഞ്ഞുവീണ് മങ്ങിയ കാട്ടുവഴികളും തേയിലക്കാടുകളും ആസ്വദിച്ച് മറയൂർ എത്തുമ്പോൾ ഇരുട്ട് വീണു തുടങ്ങിയിരുന്നു. മറയൂർ ശർക്കര വാങ്ങിയശേഷം തിരക്കൊന്നുമില്ലാത്ത തിനാൽ അങ്ങാടിക്ക് തൊട്ടുമുമ്പുള്ള പള്ളിയിൽ കയറി സന്ധ്യാ,നിശാ പ്രാർഥനകൾ ഒന്നിച്ച് പൂർത്തിയാക്കി.  വഴിയിലുടനീളം വിവിധ ദേശക്കാരായ സഞ്ചാരികൾ. യൂറോപ്യൻ സഞ്ചാരികൾ ധാരാളമുണ്ട്. ഉത്തരേന്ത്യക്കാരും കുറവല്ല. മറയൂർ താണ്ടി ചിന്നാർ വന്യജീവി സങ്കേതത്തിനു സമീപത്തെ ചായക്കടയിൽ നിർത്തി. ചുടുചായയോടൊപ്പം തൊട്ടടുത്ത റിസോർട്ടിലെ ടൂർ വന്ന വിദ്യാർഥികളുടെ മനോഹരമായ പാട്ടും ഡാൻസും ആസ്വദിച്ചു. തണുപ്പ് മേയുന്ന താഴ് വരയിൽ കൗമാരം തിമിർക്കുകയാണ്.ലോകം അവരിലേക്ക് ചുരുങ്ങിയിരിക്കുന്നു. തൊട്ടടുത്തു തന്നെയാണ് ചിന്നാർ വന്യജീവി സങ്കേതത്തിന്റെ ചെക്പോസ്റ്റ്. അവിടെ പേരും ഊരുമെല്ലാം നൽകി കാട്ടുപാതയിലേക്ക്. തമിഴ്നാടിനോട് ചേർന്ന് വീണ്ടും രണ്ടു ചെക്പോസ്റ്റുകൾ. തമിഴ്നാട് ചെക്പോസ്റ്റിൽ 50 രൂപയും നൽകി കാട്ടിലേക്ക് കടന്നു. വനപാതയിൽ വാഹനത്തിൽ നിന്ന് പുറത്തിറങ്ങരുതെന്ന് നിർദേശം കിട്ടി. വൃശ്ചിക തണുപ്പും പൗർണമി നിലാവും കൂട്ടുകൂടുന്നു. താഴ്‌വരയിൽ മഞ്ഞില്ല. നിലാവെളിച്ചത്തിൽ കാനന കാഴ്ചകൾക്ക് വല്ലാത്ത നിറവാണ്. പകുതി ദൂരം പിന്നിട്ടതും റോഡരുകിൽ തന്നെ ആനകൾ മേയുന്നു. ഹമ്പിനടുത്തു തന്നെ നിൽക്കുന്ന ആനയെ പെട്ടെന്ന് കണ്ടതിൽ പകച്ചെങ്കിലും റിയാസ് വാഹനം പതുക്കെ നിയന്ത്രിച്ച് കാഴ്ചക്ക് അവസരം നൽകി. പിന്നീടങ്ങോട്ട് ദൂരത്തേക്ക് ശ്രദ്ധപായിച്ചായി ഇരുത്തം. പിഴച്ചില ഭീമാകാരനായ 'കാട്ടി' റോഡ് മുറിച്ചുകടക്കുന്നു. വാഹനം പതുക്കെ യാക്കിയതും കാനന ജീവി തിണ്ണമിടുക്കിൽ ഒന്ന് തിരിഞ്ഞു നിന്നു. ദൈര്യത്തിന്റെ ശക്തിയിൽ അസി ഡ്രൈവറെ തോണ്ടി. ഉടന്നെ വാഹനം മുന്നോട്ട് കുതിച്ചു.ഹാവൂ.ഒരുമൽപിടുത്തം ഒഴിവായി ആശ്വാസത്തിൽ പുറകിലെ സീറ്റിൽ ഞാൻ അമർന്നിരുന്നു. കാട്ടുപൂച്ചയുടെ കുഞ്ഞ് റോഡ് മുറിച്ചു കടന്ന് അമ്മയെ തിരിഞ്ഞുനോക്കി കാത്തിരിക്കുന്നത് വന്യതയിലെ വാൽസല്യ കാഴ്ചയായി. മറയൂർ എത്തും മുമ്പ് കരിങ്കുരങ്ങുകൾ മരം കുലുക്കി ചാടുന്നത് കണ്ടിരുന്നു. വരയാടുകളെ കാണാത്ത നിരാശ ചിന്നാർ തീർത്തുതന്നു. ചിത്രവർണ്ണ ചിറകുകളുള്ള എത്രയെത്ര ഇനം കുരുവികളാണ് മൂന്നാറിന്റെ പ്രകൃതി സൗന്ദര്യത്തിന് ചുട്ടികുത്തുന്നത്. 10 മണിയോടെ ഉഡുമൽപേട്ടയിലെത്തി. പിന്നെ പൊള്ളാച്ചി വഴി പാലക്കാടേക്ക്. യാത്ര തുടരുകയാണ്. നാട്ടിൽ വാഹനം നിർത്തിയെങ്കിലും മനസിപ്പോഴും യാത്രയിൽ തന്നെയാണ്.  മതിവരാത്ത വിസ്മയങ്ങൾ തേടിയുള്ള യാത്ര.

മൂന്നാർ ഗ്യാപ്പ് റോഡ്

രണ്ടു മലകൾക്കിടയിലെ ഗ്യാപിലൂടെ വളഞ്ഞുപുളഞ്ഞ്  അവിസ്മരണീയ കാഴ്ചകൾ സമ്മാനിക്കുന്ന മുന്നാറിലെ ഇടമാണ് ഗ്യാപ്പ് റോഡ്.  മൂന്നാറിൽ നിന്ന് പൂപ്പാറവരേ ഏകദേശം 12 കിലോമീറ്റർ ദൂരത്തിൽ പ്രകൃതിയുടെ മനോഹാരിത ആവാഹിച്ച ഗ്യാപ്പ് റോഡ് സഞ്ചാരികൾ ഒരിക്കലും മിസ്സാക്കാൻ പാടില്ലാത്തതാണ്. മലകൾക്കിടയിൽ  ഹൃദയം പോലെയുള്ള ലോക്ക് ഹർട്ട് ഗ്യാപ്പ് ഒരു വിസ്മയമാണ്. മൂന്നാർ- മധുര ദേശീയ പാതയിൽ പൂപ്പാറ വരേ വിവിധ ആകർഷണ കേന്ദ്രങ്ങളുണ്ട്. ദേവിക്കുളം, ചിന്നക്കനാൽ എന്നിവിടങ്ങളിലെ കാഴ്ചുടെ മധുനുകർന്ന് മുന്നോട്ടുപോയാൽ പെരിയ കനാൽ  വെള്ളച്ചാട്ടം കാണാം. തുടർന്ന് പൂപാറയിലേക്കിറങ്ങാം. സൂര്യനെല്ലി, ശാന്തൻ പാറ എന്നീ വിനോദ സഞ്ചാര കേന്ദ്രങ്ങളിലേക്കും ഇവിടെ നിന്ന് തിരിയാം.

വീതിയുള്ള സുന്ദരമായ റോഡിലൂടെ യാത്ര ചെയ്യുന്നവർക്ക് ഒരുഭാഗത്ത് മലയും മറുവശത്ത് തേയിലത്തോട്ടങ്ങളും മുട്ടുകാട് പാടശേഖരങ്ങളുടെ വിദൂര ദൃശ്യവും കാണാം. തേയിലക്കാടുകൾക്കിടയിലൂടെ

വിതൂര താഴ് വരയിലെ ആനയിറങ്കൽ ജലാശയത്തിന്റെ കാഴ്ച വിസ്മയമാണ്. പവർഹൗസിലേക്ക് വെള്ളം കൊണ്ടു പോകുന്ന ഭീമാകര പെൻസ്റ്റോക്കുകൾ ഈ യാത്രയിൽ കാണാം. പറഞ്ഞറിയിക്കാനാവാത്ത കാഴ്ച സമ്മനിക്കുന്നതിനിടെ പഞ്ഞിക്കെട്ടുപോലുള്ള മേഘശകലങ്ങൾ കയ്യിൽ കോരിയെടുക്കാൻ കഴിയുമാറ് സഞ്ചാരിയെ തഴുകി കടന്നു പോകും. പറുദീസപോലുള്ള ഗ്യാപ്പ് റോഡ് മടങ്ങാൻ തോന്നാത്ത വിസ്മയം തന്നെയാണ്.

ഇരവികുളം നാഷണൽ പാർക്ക്

വരയാടുകളുടെ മേച്ചിൽ സ്ഥലമാണ് ഇരവികുളം നാഷണൽ പാർക്ക്. വംശനാശ ഭീഷണി നേരിടുന്ന വരയാടുകൾ(നീലഗിരി താർ) രാജമലയിലും 97 ചതുരശ്ര കിലോമീറ്റർ ചുറ്റളവുള്ള നാഷണൽ പാർക്കിലുമായി കാണാം.  അപൂർവ്വങ്ങളായ നിരവധി ചിത്രശലഭങ്ങളുടെയും മൃഗങ്ങളുടെയും പക്ഷികളുടെയും ആവാസ കേന്ദ്രം കൂടിയാണിത്. വരയാടുകൾക്ക് പുറമേ, ഏകദേശം 120 തരം പക്ഷികളുണ്ട് ഇവിടെ. ലങ്കൂർ, ആനകൾ, മലയണ്ണാൻ എന്നിവയുൾപ്പെടെ 26 വ്യത്യസ്ത  സസ്തനികളും ഇവിടെ കാണപ്പെടുന്നു. ചുറ്റിലുമുള്ള മഞ്ഞു പുതക്കുന്ന തേയിലത്തോട്ടങ്ങളുടെ ദൃശ്യഭംഗി വിവരണാതീതമാണ്.

ആനമുടി

ദക്ഷിണേന്ത്യയിലെ ഏറ്റവും ഉയരംകൂടിയ കൊടുമുടിയായ ആനമുടി ഇരവിക്കുളം ദേശീയോദ്യാനത്തിലാണ്.  2,695 മീറ്ററിലധികം ഉയരമുള്ള ആനമുടി പശ്ചിമഘട്ടത്തിലെ ഏറ്റവും ഉയരമുള്ളതും  സാഹസിക ട്രക്കിംങിന് അനുയോജ്യവുമാണ്. പൊതുജനത്തിന് ചില നിയന്ത്രണങ്ങൾ ഉണ്ട്.

മാട്ടുപ്പെട്ടി അണക്കെട്ട് 

മൂന്നാറിൽ നിന്ന് 13 കിലോമീറ്റർ അകലെയുള്ള മാട്ടുപ്പെട്ടി അണക്കെട്ട്    പ്രധാന ആകർഷണ കേന്ദ്രമാണ്. സമുദ്ര നിരപ്പിൽ നിന്നും 1700 മീറ്റർ ഉയരത്തിൽ സ്ഥിതി ചെയ്യുന്ന മാട്ടുപ്പെട്ടി ഡാമും മനോഹരമായ തടാകവും പ്രത്യേക വൈബാണ്. ബോട്ട് സവാരിക്കുപുറമെ   ചുറ്റുപാടുമുള്ള മനോഹരമായ മലനിരകളും പുൽമേടുകളും ആസ്വദിക്കാനും ഇവിടെ നിന്ന് സാധിക്കും. മൂന്നാർ ഇടുക്കി ടൂറിസം പ്രമോഷൻ കൗൺസിൽ ഇവിടെ സ്പീഡ് ബോട്ടിങ് സംഘടിപ്പിക്കുന്നുണ്ട്. സാഹസികത ഇഷ്ടപ്പെടുന്നവർക്ക് ചോല വനത്തിൽ ട്രെക്കിങിനും ഹൈക്കിങിനും അവസരമുണ്ട്.

മാട്ടുപ്പെട്ടി പശുവളർത്തൽ കേന്ദ്രം

ഇൻഡോ-സ്വിസ് ലൈവ് സ്റ്റോക്ക് പ്രോജക്ടിന്റെ ഭാഗമായ മാട്ടുപ്പെട്ടി പശുവളർത്തൽ കേന്ദ്രം ഇവിടെയാണ്.  ഉല്പാദന ശേഷി കൂടിയ വ്യത്യസ്ത ഇനം പശുക്കള ഇവിടെ പരിപാലിക്കുന്നുണ്ട്. 1963 ൽ ആരംഭിച്ച ഈ ഫാം 191 ഹെക്ടറിൽ വ്യാപിച്ചുകിടക്കുന്നു. കാളകളും പശുക്കളും ഉൾപ്പെടെ 400 ലധികം  മേന്മയുള്ള കന്നുകാലികളെ ഉൾക്കൊള്ളുന്നതാണ് ഫാം.  മൃഗസംരക്ഷണം, ബീജ ബാങ്ക്, കാലിത്തീറ്റ എന്നീ മൂന്ന് പ്രധാന വിഭാഗങ്ങൾക്കൊപ്പം, ടെക്നീഷ്യൻമാർക്കും മൃഗഡോക്ടർമാർക്കും വേണ്ടിയുള്ള  പരിശീലന കേന്ദ്രവും ഫാമിലുണ്ട്. മുമ്പ് അനുവാദിച്ചിരുന്നെങ്കിലും ഇപ്പോൾ സന്ദർശകർക്ക് നിയന്ത്രണമുണ്ട്.

പള്ളിവാസൽ ജലവൈദ്യുതി പദ്ധതി

കേരളത്തിലെ ആദ്യത്തെ ജലവൈദ്യുതി പദ്ധതി നടപ്പിലാക്കപ്പെട്ടത്  മൂന്നാറിലെ ചിത്തിരപുരത്തു നിന്ന് 3 കിലോമീറ്റർ അകലെയുള്ള പള്ളിവാസലിലാണ്. പ്രകൃതി ഭംഗി നിറഞ്ഞ ഇവിടം നല്ലൊരു പിക്നിക് കേന്ദ്രമാണ്.

ചിന്നക്കനാലും ആനയിറങ്കലും

മൂന്നാറിൽ നിന്ന് 22 കിലോമീറ്റർ അകലെ മൂന്നാർ-കുമളി റൂട്ടിലുള്ള ആനയിറങ്കൽ അണക്കെട്ട് കൗതുക കാഴ്ചയാണ്. ഈ ജലാശയം തേയിലത്തോട്ടങ്ങളാലും നിത്യഹരിത വനങ്ങളാലും ചുറ്റപ്പെട്ടതാണ്. ചിന്നക്കനാലിൽ നിന്ന് ഏഴ് കിലോമീറ്റർ  സഞ്ചരിച്ചാൽ ആനയിറങ്കലിൽ എത്താം. ചിന്നക്കനാൽ അണക്കെട്ട് കാണേണ്ട മറ്റൊന്നാണ്. പൂപ്പാറയിൽ നിന്ന് ആനയിറങ്കലിലേക്ക് തിരിയാം. ദേവികുളവും പ്രധാന സഞ്ചാര കേന്ദ്രമാണ്.

ടോപ്പ് സ്റ്റേഷൻ

മൂന്നാറിൽ നിന്നും 39 കിലോമീറ്റർ അകലെ സമുദ്ര നിരപ്പിൽ നിന്നും 1700 മീറ്റർ ഉയരത്തിലാണ് ടോപ്പ് സ്റ്റേഷൻ സ്ഥിതി ചെയ്യുന്നത്. മൂന്നാർ-കൊടൈക്കനാൽ റോഡിലെ ഏറ്റവും ഉയർന്ന സ്ഥലമാണ് ഇത്. മൂന്നാറിലെത്തുന്ന സന്ദർശകർക്ക്  തമിഴ്നാടിലെ തേനി താഴ് വരയുടെ മനോഹരദൃശ്യം ആസ്വദിക്കാൻ ടോപ്പ് സ്റ്റേഷനിൽ വാച്ച്ടവർ ഉണ്ട്. നീലകുറിഞ്ഞി പൂക്കുന്ന പ്രധാന സ്ഥലങ്ങളിൽ ഒന്നാണ് ഇത്. പഞ്ഞിക്കെട്ടുപോലെയുള്ള  മേഘങ്ങൾ നമ്മെ സ്പർശിച്ച് പാറിയകലുന്നത് ഇവിടുത്തെ അനുഭവമാണ്.  പന്ത്രണ്ട് വർഷത്തിലൊരിക്കൽ ഇവിടെ വിരിയുന്ന നീലക്കുറിഞ്ഞി പൂക്കളാൽ ഈ പ്രദേശം പലപ്പോഴും നീലകലർന്ന  ഭാവത്തിലായിരിക്കും. ടോപ്പ് സ്റ്റേഷന് സമീപമാണ് കുറിഞ്ഞിമല വന്യജീവി സങ്കേതം.

ടീ മ്യൂസിയം

 തേയിലത്തോട്ടങ്ങളുടെ തുടക്കവും വളർച്ചയും സംബന്ധിച്ച ചരിത്രം പ്രദർശിപ്പിക്കുന്ന ടീ മ്യൂസിയം മൂന്നാറിൽ ടാറ്റ ടീയുടെ ഉടമസ്ഥതയിൽ ഉള്ളതാണ്. നല്ലതണ്ണി എസ്റ്റേറ്റിലാണ് മ്യൂസിയം സ്ഥിതി ചെയ്യുന്നത്.1880 കളിൽ സ്ഥാപിതമായ ഈ തേയിലത്തോട്ടം കണ്ണൻ ദേവൻ ഹിൽസ് പ്ലാന്റേഷൻസ് കമ്പനി പ്രൈവറ്റ് ലിമിറ്റഡിന്റെ ഉടമസ്ഥതയിലായിരുന്നു, 2005 ഏപ്രിൽ 1 ന് മ്യൂസിയം പൊതുജനങ്ങൾക്കായി തുറന്നുകൊടുത്തു.

കുണ്ഡല ഡാം 

മൂന്നാറിൽ നിന്ന് ടോപ് സ്റ്റേഷൻ റോഡിൽ ഏകദേശം 20 കിലോമീറ്റർ അകലെ സ്ഥിതി ചെയ്യുന്ന കുണ്ഡല ഡാം ഏഷ്യയിലെ ആദ്യത്തെ കമാന അണക്കെട്ടാണ്. പെഡൽ ബോട്ടുകൾ, റോ ബോട്ടുകൾ, കശ്മീരി ശിക്കാര എന്നിവ ഇവിടുത്തെ ആകർഷണമാണ്. 1946 ൽ പള്ളിവാസൽ ജലവൈദ്യുത പദ്ധതിയുടെ ഭാഗമായി നിർമ്മിച്ച സേതുപർവതി അണക്കെട്ടും ഇവിടെയാണ്.

പെരിയകനാൽ വെള്ളച്ചാട്ടം

മൂന്നാറിൽ നിന്ന് ഏകദേശം ഏഴ് കിലോമീറ്റർ അകലെ കമ്പം തേനി ദേശീയ പാതയിലെ ഗ്യാപ്പ് റോഡിലാണ് പെരിയകനാൽ വെള്ളച്ചാട്ടം. സൂര്യനെല്ലിയിലേക്കുള്ള വഴിയുടെ രണ്ടു കിലോമീറ്റർ അടുത്താണിത്. പവർ ഹൗസ് വെള്ളച്ചാട്ടം എന്നാണ് പെരിയകനാൽ വെള്ളചാട്ടം പ്രദേശികമായി അറിയുക. സമുദ്രനിരപ്പിൽ നിന്ന് 2000 മീ. ഉയരമുള്ള കുത്തനെയുള്ള പാറക്കെട്ടിൽ നിന്ന് താഴോട്ട് പതിക്കുന്ന ഈ വെള്ളച്ചാട്ടം മനോഹര കാഴ്ചയാണ്.

ആറ്റുകാൽ വെള്ളച്ചാട്ടം

മൂന്നാറിൽ നിന്ന് 9 കിലോമീറ്റർ അകലെ സ്ഥിതി ചെയ്യുന്ന ആറ്റുകാൽ വെള്ളച്ചാട്ടം, പള്ളിവാസലിലേക്കുള്ള വഴിയിലാണ്, 

ചീയപ്പാറ വെള്ളചാട്ടം

കൊച്ചി-മൂന്നാർ റൂട്ടിൽ സ്ഥിതി ചെയ്യുന്ന പ്രശസ്തമായ വെള്ളച്ചാട്ടമാണിത്. മലമ്പാതയിൽ അടിമാലി ടൗൺ എത്തുന്നതിന് മുമ്പാണ് ചീയപ്പാറ വെള്ളച്ചാട്ടം. വർഷക്കാലത്ത് റോഡിലേക്ക് വെള്ളം ചീറ്റിതെറിക്കുന്നത് ആസ്വദിക്കാനാവും.

ലക്കം വെള്ളച്ചാട്ടം

ഇരവികുളം ദേശീയ ഉദ്യാനത്തിനടുത്തുള്ള  മനോഹരമായ വെള്ളച്ചാട്ടമാണ് ലക്കം വെള്ളച്ചാട്ടം.മറ്റു വെള്ളച്ചാട്ടങ്ങളെ അപേക്ഷിച്ച് ഇത് ചെറുതാണ്.

ചിന്നാർ വന്യജീവി സങ്കേതം

മൂന്നാറിൽ നിന്ന് ഉഡുമൽപേട്ട റൂട്ടിൽ ഏകദേശം 50 കിലോമീറ്റർ അകലെ സ്ഥിതി ചെയ്യുന്ന ചിന്നാർ വന്യജീവി സങ്കേതം 90 ചതുരശ്ര കിലോമീറ്റർ വിസ്തൃതിയുള്ളതാണ്. നരച്ച ഭീമൻ അണ്ണാൻ, നീലഗിരി താർ, പുള്ളിമാൻ, കാട്ടി,ആന എന്നിവയുടെ ആവാസ കേന്ദ്രമാണിത്. കേരളത്തിലെ 12 സംരക്ഷിത മേഖലകളിൽ ഒന്നാണിത്. കടുവ,പുലി, ആന, പുള്ളിമാൻ,കാട്ടി എന്നിവയുൾപ്പെടെ ഏകദേശം 34 ഇനം ജന്തുജാലങ്ങളും 245 ലധികം ഇനം പക്ഷികളും ഇവിടെയുണ്ട്.  ചിന്നാറിൽ  ചന്ദനക്കാടുകൾ ധാരാളമായി ഉണ്ട്. 1,000 ത്തിലധികം ഇനം ഔഷധ സസ്യങ്ങളും പൂച്ചെടികളും ഇവിടെ കാണാം. വനം വകുപ്പും പ്രാദേശിക ആദിവാസി സമൂഹങ്ങളും പരിസ്ഥിതി വികസന സമിതികളും സംയുക്തമായി സംരക്ഷിക്കുന്ന ഈ വന്യജീവി സങ്കേതത്തിൽ ടൂറിസം സാധ്യത ഏറെയാണ്. ചിന്നാറിലെ ട്രീ ഹൗസ്, വാസിയപ്പാറയിലെ ട്രെക്കിംഗ്, ക്യാമ്പിംഗ്, നദി ട്രെക്കിംഗ്, വാച്ച് ടവറിലേക്കുള്ള പ്രകൃതി പാത, തൂവാനം വെള്ളച്ചാട്ടത്തിലേക്കുമുള്ള ട്രെക്കിംഗ് തുടങ്ങിയ പരിസ്ഥിതി ടൂറിസം ഇവിടെയുണ്ട്.

തേയിലത്തോട്ടങ്ങൾ

 

മൂന്നാറിൽ 55-ഓളം തേയിലത്തോട്ടങ്ങളുണ്ട്.  തേയിലത്തോട്ടങ്ങളുടെ ഭൂമിയാണ് മൂന്നാർ എന്ന് പറയാം. 145 വർഷത്തെ പഴക്കമാണ് ഇവിടുത്തെ തേയിലത്തോട്ടങ്ങൾക്ക് ഉള്ളത്. മൂന്നാറിൽ സന്ദർശിക്കേണ്ട പ്രധാന സ്ഥലങ്ങളിൽ ഒന്നായി തേയിലക്കാടുകൾ പലപ്പോഴും എണ്ണപെടാറുമുണ്ട്. ഈ തോട്ടങ്ങളിൽ ഭൂരിഭാഗവും ടാറ്റ ഗ്രൂപ്പിന്റേതാണ്,  AVT ടീ, ഹാരിസൺ മലയാളം, ബ്രൂക്ക് ബോണ്ട്, മൈക്കിൾസ് ടീ എന്നിവ ഉൾപ്പെടുന്നുൾതാണ് മറ്റുള്ളവ.  മൂന്നാർ ഇന്ത്യയിലെ ഏറ്റവും വലിയ തേയില വ്യാപാര കേന്ദ്രങ്ങളിൽ ഒന്നാണെന്നു പറയാം. ചായത്തോട്ടങ്ങൾ കണ്ടുകൊണ്ട് മലമടക്കുകളിലൂടെയുള്ള യാത്രയും തുശാരം ചൂടിയ തണുപ്പുമാണ് മൂന്നാറിലെത്തുന്നവരെ ആനന്ദിപ്പിക്കുന്ന പ്രധാന ആകർഷണം.

എക്കോ പോയിന്റ്

മൂന്നാറിൽ നിന്ന് ഏകദേശം 15 കിലോമീറ്റർ അകലെ സ്ഥിതി ചെയ്യുന്ന ടോപ്പ് സ്റ്റേഷനിലേക്കുള്ള വഴിയിലാണ് എക്കോ പോയിന്റ് സ്ഥിതി ചെയ്യുന്നത്. ഇവിടെ യുള്ള തടാകക്കരയിൽ വച്ച് സന്ദർശകർ ഉച്ചത്തിൽ വിളിച്ചു പറയുന്നവയുടെ പ്രതിധ്വനി കേൾക്കാൻ നല്ല രസമാണ്. ഉയർന്ന പാറക്കെട്ടുകളിൽ തട്ടി ഇങ്ങനെ പ്രതിധ്വനി കേൾക്കുന്നത് കാണ്ടാണ്  എക്കോ പോയിന്റ് എന്ന് പേരുവന്നത്. കുന്നുകളിൽ നിന്ന് കേൾക്കാൻ കഴിയുന്ന പ്രകൃതിദത്ത പ്രതിധ്വനിൾ വല്ലാത്ത അനുഭൂതിയാണ് സഞ്ചാരികൾക്ക് സമ്മാനിക്കുക.

ഫോട്ടോ പോയിന്റ് 

 ദൃശ്യചാരുതയേകുന്ന പ്രകൃതിയും, സിൽവർ ഓക്ക് തോട്ടങ്ങളും, തേയിലത്തോട്ടങ്ങളും, വെള്ളച്ചാട്ടങ്ങളും, കുന്നുകളും, താഴ്‌വരകളും ഉൾപ്പെടുന്ന  ഇടമാണ് ഫോട്ടോ പോയിന്റ്. മൂന്നാറിൽ നിന്ന് 3 കിലോമീറ്റർ അകലെ മാട്ടുപ്പെട്ടിയിലേക്കുള്ള വഴിയിലാണ് ഈ സ്ഥലം. പ്രൊഫഷണലുകളും അമേച്വർ ഫോട്ടോഗ്രാഫർമാരും ഇവിടെ പതിവായി എത്തുന്നതിനാൽ ഇതിനെ "ഷൂട്ടിംഗ് പോയിന്റ്" എന്നു വിളിക്കപെടുന്നു.  മനോഹരമായ സെൽഫികളും ഗ്രൂഫികളും റീൽസുകളുമെല്ലാം ഇവിടെവച്ച് ചിത്രീകരിക്കാനാവും.

മറയൂർ ചന്ദനക്കാട്

പശ്ചിമഘട്ടത്തിന്റെ കിഴക്കേ ചെരുവിൽ ചന്ദനക്കാടുകൾക്ക് പേരുകേട്ട സ്ഥലമാണ് മറയൂർ. പുരാതന ശിലായുഗ ഗുഹകൾ ഉള്ള ഇവിടെ പ്രാചീന ഗോത്ര സമൂഹങ്ങൾ ജീവിച്ചിരുന്നതിന് തെളിവുകൾ ഉണ്ട്. മൂന്നറിൽ നിന്ന് ഉഡുമൽപേട്ട റൂട്ടിൽ ഏകദേശം 39 കിലോമീറ്റർ അകലെ സ്ഥിതി ചെയ്യുന്ന മറയൂരിലേക്കുള്ള ചുരംപാത ഇടുങ്ങിയതാണ്. തമിഴ്നാട്, കർണാടക സംസ്ഥാനങ്ങളിൽ നിന്നുള്ളവർ ഇതുവഴിയാണ് മൂന്നാറിൽ എത്തുക.  പാലക്കാട്, മലപ്പുറം ജില്ലക്കാർ ഉൾപെടെ വടക്കൻ കേരളത്തിൽ നിന്നുള്ളവർക്ക് ട്രാഫിക് ഇല്ലാതെ ദൂരം കുറച്ച് മൂന്നാറിലെത്താനുള്ള റൂട്ടാണിത് പാലക്കാട്,പൊള്ളാച്ചി, ഉഡുമൽപേട്ട്. അവിടുന്ന് ചിന്നാർ വഴി മറയൂർ എത്താം മലകയറിയാൽ മൂന്നാർ ആയി. കലർപ്പില്ലാത്ത ശർക്കര ഉൽപാദിപ്പുന്ന കേന്ദ്രം കൂടിയാണ് മറയൂർ. മറയൂർ ചന്ദനവും ശർക്കരയും പേരുകേട്ടതാണ്. ചന്ദനക്കാടുകളിലേക്കുള്ള ട്രക്കിംങിനുള്ള സൗകര്യമുണ്ട്. വിവിധ വെള്ള ചാട്ടങ്ങളും വ്യൂ പോയിന്റുകളുമുള്ള മറയൂരിൽ ഹോം സ്റ്റേകളും റിസോർട്ടുകളും ലഭ്യമാണ്.

ബോട്ടാണിക്കൽ ഗാർഡൻ

മൂന്നാർ നഗര ഹൃദയത്തിലെ നിന്ന് അൽപ്പം മാറി ദേശീയ പാതയിൽ ഗ്യാപ്പ് റോഡിലായാണ് ബോട്ടാണിക്കൽ ഗാർഡൻ സ്ഥിതിചെയ്യുന്നത്. മനോഹരമായ ഉദ്യാനവും വിശ്രമ സ്ഥലവുമാണിത്. പനിനീർ ചെടികളുടെ മാത്രം റോസ് ഗാർഡനും മൂന്നാറിൽ ഉണ്ട്.

പ്രധാന ടൂറിസ്റ്റ് കേന്ദ്രങ്ങൾക്ക് പുറമെ സ്വകാര്യ ഉടമസ്ഥതയിൽ വ്യത്യസ്ത പദ്ധതികൾ മൂന്നാറിൽ സഞ്ചാരികളെ കാത്തിരിക്കുന്നുണ്ട്. ഹോട്ട് എയർ ബലൂൺ, പാരാഗ്ലൈഡിങ് തുടങ്ങിയ സാഹസിക പ്രവർത്തനങ്ങൾക്ക് ഇവിടെ അവസരമുണ്ട്. 

മീനുളിയൻ പാറ,കാർമ്മൽഗിരി എലിഫന്റ് പാർക്ക് , ബ്ലോസം പാർക്ക്, പൊതമേട് വ്യൂ പോയിന്റ്,  കൊളുക്കുമല ടീ എസ്റ്റേറ്റ്,

ലോക്ക്ഹാർട്ട് ഗ്യാപ്പ് വ്യൂ പോയിന്റ് , വണ്ടർ വാലി അഡ്വഞ്ചർ ആൻഡ് അമ്യൂസ്‌മെന്റ് പാർക്ക് ,സി.എസ്.ഐ ക്രൈസ്റ്റ് ചർച്ച്, ദേവികുളം സീതാദേവി അണക്കെട്ട്, ന്യായമക്കാട് വെള്ളച്ചാട്ടം എന്നിവയും സന്ദർശിക്കാവുന്ന ഇടങ്ങളാണ്.

 സഞ്ചാരികൾ ഇടുക്കി, തേക്കടി, കുമളി എന്നീ പ്രദേശങ്ങൾ കൂടി സന്ദർശിക്കുന്ന തരത്തിൽ ട്രിപ് പ്ലാൻ ചെയ്യുക. ഒറ്റദിവസം കൊണ്ട് മൂന്നാറിൽ എത്തി മടങ്ങാൻ ഉദേശിക്കുന്നവർ രാവിലെ ആദ്യം ഇരവികുളം നാഷണൽ പാർക്കാണ് സന്ദർശിക്കേണ്ടത്. വനംവകുപ്പിന്റെ വാഹനത്തിൽ മാത്രമേ രാജമലയിലേക്ക് എത്താനാകൂ. സീസണിൽ തിരക്ക് കൂടുതലായതിനാൽ മണിക്കൂറുകൾ കാത്തിരിക്കേണ്ടിവരും. ഇത് മറ്റു സ്പോട്ടുകൾ സന്ദർശിക്കാനുള്ള അവസരം നഷ്ടപ്പെടുത്തിയേക്കാം. എട്ടുമണി മുതൽ 4.30 വരേയാണ് ടിക്കറ്റ് ലഭിക്കുക. രാജമലയ്ക്കു ശേഷം ഗ്യാപ്പ് റോഡ്, ബോട്ടാണിക്കൽ ഗാർഡൻ ,മാട്ടുപ്പെട്ടി,കുണ്ടല ഡാം, എക്കോ പോയിന്റ്, ടോപ്പ് സ്റ്റേഷൻ എന്നിങ്ങനെ ട്രിപ് പ്ലാൻ ചെയ്യാം. കമ്പം തേനി വഴിയോ, മറയൂർ വഴിയോ തമിഴ്നാട്ടിലേക്ക് ഇറങ്ങാം. കുമളി വഴിയും താഴെയെത്താം. അടിമാലി വഴി കൊച്ചിയിലേക്കും ഇറങ്ങാം.  വീണ്ടും വീണ്ടും മാടിവിളിക്കുന്ന ഹിൽസ്റ്റേഷനാണ് മൂന്നാർ എന്ന് ഒരിക്കൽ പോയവർ സാക്ഷ്യപെടുത്തും.